<<無心機做past paper>> (2009-01-17 六)

自上個禮拜好成功咁做左一年既past paper之後, 今個禮拜又好想去試下再下一城, 但是呢, 做唔倒囉. 因為, 朝早起身都仲有好恒心既, 但係, 好快就無乜心機了, 因為果d題目要排車位, 都唔係考structure 野既, 都唔關事既... 所以做做下就無心機, 只是做了個scheme 果一part啦.

中午之後, 見咁好太陽, 落左去游水. 好好呢, 很暖. 這裏的天氣真的很好. 這陣子雖然是大風, 但是有得曬住太陽咁去游水真係幾好feel架.

之後返左屋企啦, 本來諗住等小燕做完d野可以出去食飯同埋行陣啦. 結果等到七點佢都未做完野, 於是改變計劃自己一個人行bugis諗住睇電話, 但是八點小燕打電話黎又話做得晒d野喎. 好, 最後我地兩個去左牛車水既CNY Market果度逼人啦. 這裏既年宵市場同香港有點不同啦, 賣既野唔同啦, 要點如下:

1) 呢度因為天氣熱, 所以無乜得年花選擇既, 主要是賣假花.
2) 呢度既賀年食品跟香港的不同, 呢度過年送禮興送肉乾, 同埋柑. 其中以林志榮既肉乾最出名, 所以新年前要排長龍都未必買倒既. 同埋呢, 糖果就一樣會有啦, 再加上呢度有好多不同的cookie, 如 almond cookie, pineapple tart等等, 這些都是香港無的.
3) 至於水果, 呢度除左柑之外, 過年還興菠蘿, 葫蘆, 金瓜 (即南瓜) 等等奇奇怪怪的水果.
4) 呢度既年宵還有"立味"賣呢

都幾得意呀, 小燕買左d野, 我就無買到.

之後我地去了牛車水既食街食野, 之後呢, 我地去左bugis既波樓篤波. 呢度篤波都有度好, 就係完全禁煙既, 同埋完全唔會有雜既感覺. 大家都在篤波. 還有電視睇. 環境不錯的. 但唯一覺得可惜的是這裏只興玩pool, 唔興玩snooker的. pool好像沒有snooker那樣多tactics...唔緊要, 玩下新野也好. 小燕的朋友Jeffery也有來. 很好呢. 認識新的朋友. 玩到好夜, 差不多十二點先至搭巴士走. 我地三個走路去到小燕家附近才分開, 我返到屋企都點幾了.

<<做唔晒d野>> (2009-01-16 五)

今天做極都做唔晒d野. 真係好多野做呢. 整天都好趕好趕呢, 算啦, 其實日日都係咁架啦.

由於聽日唔想返工, 所以今天想盡量做好晒d野佢. 結果, 都做唔晒啦, 但係都走了. 拎埋部電腦走因為禮拜一朝早返一返office.

如果今天晚上做到九點幾, 既返唔倒教會, 也去唔倒同同事們既steamboat同埋唱K, 算啦, 禮拜五休息一下啦.

<<唔該晒你呀>> (2009-01-15 四)

今天返工都叫做幾忙咁啦, 咁放工都是要返去開會啦. 返去開會有時都幾悶既, 都係聽下人地講野咁啦, 當係八掛下咁囉. 但係最搞笑的最近都算做係條drain 了...哈哈.

之後呢, 一班同事今天晚上叫了pizza, 佢地話要慶祝個footing 終於起好喎, 但係我就走左啦, 因為今天晚上約了小燕食飯. 我地在公司樓下等, 我地去了對面的風味園. 好耐無黎過呢個地方了. 以前還在office做野的時候我成日黎呢度食飯架, 但係自從去左地盤之後就少左好多了. 今天晚上都好好呀, 間中約下小燕食飯見下都好. 更加好既係新年既時候我托佢係東馬來西亞買既bird's nest佢拎左俾我啦. 好, 返香港有得送禮了. 真係唔該晒你呀. 之後呢, 講講下, 我同佢講話部電話壞左... 佢話不如借住佢果部spare的電話. 實在太好啦, 咁樣我就可以返香港先至買電話了, 唔使急住係度買. 好. 佢先借左個電話給我, 還有, 我仲俾左我呢個壞既電話佢, 佢話佢有個朋友乜野電話都識整喎... 真係唔該晒你呢...飯後還上了佢屋企攞埋個差電器. 很好很好

之後烏龍的事發生了. 因為我一向是把電話號碼save在電話裏面, 我現在剛借的電話是乜人既電話都無既. 返到屋企門口, 先至發覺因為今天我拎住自己部notebook無鎖在地盤, 所以我係漏左抽鎖匙在地盤的...權哥又未返, 我又無佢電話... 真係超級烏龍呢. 之後在門口由十點等到十點半倒權哥返黎我先至有門口入... 真係超級烏龍呢.

真係多謝晒你呀小燕.

<<電話壞了>> (2009-01-14 三)

今天早上我還可以打的電話, 今天中午出去vivo度食飯的時候發覺no service, 跟住就成個下晝都no service了. 用過simon 的電話來試試, 證明了自己的電話是壞了. 看來這個用了兩年半的電話都是差不多時日的了...

<<疲累的工作>> (2009-01-12 to 2009-01-14 一至三)

這幾天工作很累呢, 有一兩天返到屋企十一點就訓了.

有樣野值得記下的是, 我這幾天真係算係激嬲了這裏的SRE. 真係好難搞呀. 未諗倒點處理.

<<周圍行>> (2009-01-11 日)

今天早上去了游水, 再返了崇拜. 今天的崇拜是講關於神的說話. 我地要點樣對待神既說話...

之後自己一個人去了行singapura, 去了那裏打街機呢. 在這裏我發現原來而家既街機係可以打winning的, 同埋應該是連線打的. 都幾過癮呀, 可以同日本既人一齊打. 但是畫面就不太流暢了. 不過唔緊要. 好好既係呢度既機鋪是禁煙的, 很好.

想搵既野都是搵唔倒, 算. 晚上回家了.

<<迷失Kallang>> (2009-01-10 六)

這天去不了pulau ubin, 因為kit yi不太舒服了. 不要緊, 今天決定專心在家讀書. 很難得是整天都在家呢. 在家做了04年Q1, 都算係咁啦, 都唔叫做做得太慢, 只是很肚餓吧. 晚上和raymond 去了kallang leisure park果度食飯睇戲, 先是去了間食西餐既地方, 都幾好食呀, 睇赤壁2, 都幾好睇, 但是因為是睇九點九場, 睇完既時候都已經差不多十二點了... 真係弊. 呢度無車出番去. 因為呢度係離開左個城市既. 我地咁夜見倒求其有車就上. 上到去, 加車是去city hall方向的, 結果就車左我地兩個去了concourse, 即係公司果度, 我地係果度再坐的士返歸. 返到屋企好夜了.

<<三天的工作天>> (2009-01-07 to 2009-01-09 三至五)

這幾天都係咁啦, 都是忙忙忙, 都唔知點解會咁忙既, 明明要做既野唔太多, 但係就是忙.

<<不好的兩天>> (2009-01-05 to 2009-01-06 一至二)

這兩天過得不太好.

<<一般的拜日>> (2009-01-04 日)

這天早上在家洗地, 打掃, 然後就返教會, 再之後就是去了singapura剪頭髮, 再上了raymond tsang屋企打邊爐. 很好的一天.

<<Retreat to Batam>> (2009-01-01 to 2009-01-03 四至六)

今日好好呀, 今日我同教會一班朋友去印尼的batam果度退修. 我今朝很早就起左身, 然後呢, 執好晒野之後就搭地鐵出發去tanah merah, 然後再轉了35號巴士去tanah merah ferry terminal TMFT. 我去到既時候其實也不早了, 差不多我九點半過d先至到. 跟住我就一個人去了那一家canteen 食了個早餐, 當然是食了些很本地的早餐了. 食了kaya toast同埋飲了杯milo. 跟住就等啦, 其實都差不多時間了. 首先是jasmine到了, 然後其他人也跟大隊到了. 很好很好. 佢地個個都帶左好多野呢...我只是帶了一個背包只裝了這幾天要著既衫同埋水樽同埋拖鞋. 但係呢, 佢地就勁啦, 成個冰櫃帶左, 然後又有人帶了ps3, 還帶了幾代board game, 平均佢地都是帶左一個gip咁啦...三日兩夜啫, 真係誇張... 算. 好 我地入閘了, 我地一行大概26人, 連埋pastor lilian, 真係好多人一齊去呢. 入閘, 過關, 我諗都只有我一個人唔係行singaporean既通道了. 哈哈. 我地去啦, 跟住就上船啦,

這次的船是單體船, 也沒有上次去bintan的時候果一隻咁靚啦. 呢隻好似唔係好新. 即係舊啦. 我地上到船都無乜位了, 咁就落左去下面船艙. 落到去其實都有點焗. 但是, 算啦. 最唔掂既係呢度既window係有glass, 但是離不穿的, 很模的, 所以, 有等於無, 根本都分不出方向... 算把啦. 坐低, daniel坐我隔離. daniel都是一個很有趣的人, 佢呢程船除了同我吹下水之外, 還教了我很多singapore slang... 他真的是一個很好的老師呢. 例如有以下幾個

1) cannot make it already.
可以話人地既野not up to standard or not up to expectation. 例: The uniform of the hotel bell boy is dirty, then you can say:"this hotel ah...really cannot make it." 又或者是當有些野壞左, 你都可以咁講, 例: When the banana is spoiled, you want to tell your friend not to eat it. You can say: "hey, the banana is spoiled, cannot make it already, dun eat."

2) Jalat
大概是poorly的意思. 例: one day daniel beats sam and snaps on his face, the one day Jason tell me: "yesterday, daniel beated sam jalat jalat" 第二個意思是感歎, 例:"Jalat liao, the shop is closed."

3) Steady
這裏有肯定的意思, 例: When you want to watch movie with your friend, you can say:"hey fred, let's go movie tomorrow, steady or not." "steady" 有時候還會加上 steady bom be be...這我也不太明是甚麼意思

4) powerful / rocks
很棒的意思, 例: you find that the fried kway tiew very good, you can say:"the kway tiew of that stall, powerful!!!" or "the kway tiew of that stall rocks"

大概就學了這麼多了. 很搞笑呢.

坐船坐了一個鐘倒就到了, 都是因為時差的問題, 所以去到的時候還是當地時間十一點, 跟住就到碼頭, 然後已經有車載我地去我地要去的地方, 這次我們是住在nongsa point marine resort. 我地上了小巴, 然後坐左大概十五分鐘倒車就到了. 這裏很大呢. 我地去到lobby, 先是放下行李啦. 原來佢地已經準備了飯盒一齊食. 我地每人都有一個燒味飯盒呢, 佢地真係諗得周到. 但是就是要等時間啦, 大概由十二點等到下午兩點先至可以check in, 咁我地就求其搵個地方去hae, 我就同佢地玩果d估字既英文咭...對我來講很難呢, 一來我英文不太好, 二來, 原來這是新加坡版, 有些根本我都唔知道係乜野黎既, 如bukit batok, asian civilization museum, roti john...不過都好過癮啦玩得. 之後就可以去自己間房, 我們廿幾個人租了三間chlate, 簡單d黎講就是三間屋啦. 都很好. 我地其實整天都是hae的, 也沒有甚麼活動. 我地收拾了, 跟住就去了游水. 一大班男仔就去了泳池度hae, 之後很快又落雨了. 我地去了其中一間store買野再返去. 之後就等食晚飯了. 我地去了男仔房果度食飯. joel已經帶了廿幾人既份量既食物黎煮, 真係西利, 佢一個人煮了我地廿幾人既份量, 有肉醬通分, 有烤腸, 有面包, 很好呢, 還有, 飯後還整了甜品, 是stawberry加cream 加vanilla ice-cream, 很好食呢. 食飯的時候我跟他們討論了, 原來, 當我地香港人覺得新加坡人講英文好得意既時候, 其實原來佢地都覺得我講英文都講得好得意的. 有陣時佢地故意扮我講英文, 我都分辨不出來的. 好搞笑.

飯後就去了分組, 大家都是分享一下今年下半年發生的事吧. 廿幾人的分享也很好. 分享到十二點幾, 即是新加坡時間成一點了.

之後早上起來, 我先是去了break water那裏, 那裏環境很好, 很靜. 在那裏祈禱後然後就去了食早餐. 早餐之後去了靈修, 去了另外一邊的海灘. 這裏雖然多點蚊之外都好好架啦, 又不會太曬. 之後返歸, 返左去男仔房, 因為有野食. 呢餐都是自己煮. 佢地煮了pizza 同埋mushroom soap. 很好呢. 很好味. 飯後我地男仔無乜野做又落左去游水. 今天天氣比昨天好多了. 很天晴. 我地係泳池玩水球. 玩到顛左.

之後四點倒我地坐左車出去town. 原來坐車出town都要差不多一個鐘, 我地去到, 第一件事就是去做messege, 我地成廿人去做messege, 佢地真係可以一黎就廿幾人就咁入左去做按摩了. 西利, 咁都做得倒. 我就做左一個半鐘既, 嘩, 鬆晒. 之後去了行商場買野. 我買了些零食, 佢地很多人是黎呢度買即食面囉... 佢地好鐘意食果d indo mee. 佢地有人是一買就買一箱的... 雖然呢度真係平過新加坡好多, 但係都唔使咁誇張吧... 也有人買了一箱啤... 跟住我地坐車去食海鮮, 去了那一家叫做golden prawn 的地方. 這裏的海鮮檔是在一個湖邊吧. 叫了個coconut, 但不是太甜, 有點酸. 海鮮都ok啦, 只是我不太食得. 最搞笑的就是daniel同eugene去唱果d潮州人既歌, 很搞笑, 之後也是jason的生日的慶祝. 很開心的一晚.

回到去, 這裏的星空很美呢.

"如果你係度就好啦" -- 也許沒有這種感覺了.

回去, 很累, 睡了.

第二朝, 即是禮拜六朝起身然後食早餐. 在食早餐的時候同pastor lilian傾左偈傾左好耐, 或許佢應該不是太認識我吧. 但是很好的是她也識得廣東話. 很好很好.

然後有靈修的時間, 然後就要執拾了.

走的時候也是在lobby等了很久, 下午二點的船走人, 一小時的船程, 但是回到去都已經是四點了.

回了家, 然後晚上和權哥去煮野食. 很好.

睡了. 不知怎的很累.

09年有一個好開始.

<<一半的禮拜>> (2008-12-29 to 2008-12-31 一至三)

呢個禮拜就真係完全無心機返工啦, 事關, 我地禮拜三是除夕, 我地只需要返半day, 然後一月一日又放public holiday, 一月二日就請了假, 之後又禮拜六日喎... 嘩, 勁. 所以呢, 今個禮拜真係無晒心機返工啦.

禮拜一禮拜二都是返工放工咁啦, 無乜特別.

禮拜三是除夕, 今天只用返半晝. 其實做做下野都要差不多下午兩點零走人. 之後跟了raymond tsang和simon 去了VIVO果一便既食德國野既地方食晏同埋飲啤酒, 都幾好味呀, 我地點了一個併盆, 同埋一個沙律. 咁就夠三個人食了. 我地每人也叫了杯啤, 真是悠閒的, 對住個海就係就係度食了... 真係幾歎.

之後我就先返了屋企, 再之後差不多六點零又出發因為今天晚上是在教會有個感恩會. 我八點鐘返到去yc, 感恩會裏面有很多人都有講出感謝神的事, 很好很好. 之後是KY全部既崇拜一齊去有一個一齊的感恩會. 那樣也很好的.

唔知點解呢個就真係有點怪怪的, 聯合感恩會在十點鐘開始, 一黎我地唱歌讚美既時候要在同一個崇拜裏面唱廣東, 華語同埋英文三種語文既詩歌...知道麗英姐要去另一個教會繼續服侍, 願神祝福佢啦.

我地係呢度崇拜到十二點既時候仲可以倒數呢. 講完新年快樂之後就聖餐, 然後就可以離去了.

返屋企要執野了, 明天去camp!

<<回歸平淡的禮拜天>> (2008-12-28 日)

今天我終於回歸平淡, 起身食早餐後就洗地, 洗左成朝, 乾淨晒.

下晝返教會. 今個禮拜簡簡單單的, 很好. 因為佢地剛完了CCIS, 佢地真係好西利呢, 可以係orchard road搞了五場的演出. 我看他們的相現場觀眾的反應也很好很好. 今天ian wong講道的, 講的也和新年有關吧. 主要的內容是:

- Do great things with great cause; then should have great passion.
- Jesus had done great things with great cause that he had the passion to follow the Father's will and sacrificed on the cross.
- We also need great passion, and focus on the cause on our mission.

之後我就走了, 先是去了百勝樓搵文具, 再行了整個civil district經過了紀念碑, parliment, superme court, 等等, 我發覺我真係未行過呢便既, 再去了esplanade諗住去影白色波波. 見倒原來有counter可以寫野落d波波度然後dum落海的. 我得一個人就唔好晒左人地既波波啦. 然後就返番去行了一個mynamar人既商場, 裏面有一間有超級多波鞋既鞋店... 我諗裏面有既鞋多過成條波鞋街. 真係超西利. 然後返番去食野, 再返了去百勝樓買了A3紙和其他文具, 然後就返歸了.

<<停了的巨輪>> (2008-12-27 六)

今朝本來諗住唔返工的, 但是ansari不停咁打電話黎...我還是懶閒閒的食早餐, 返工, 返到去都十一點幾了. 返去其實好似要同ansari打工咁, 佢好似有好多野要我做... 算啦, 佢d野都其實是簡簡單單的. 結果還是慢慢的做, 慢慢的做, 做到十二點零wendy也有回來地盤. 看來她也很忙. 哈哈, 周末我們雖然返左黎, 但是還是用了很多時間在吹水跟食柑. 佢買果d BB柑又真係幾甜喎. 唔知係邊度買. 做到五點倒就走人. 我同佢因為要等巴士所以影左好多地盤既相同埋video. 算是記錄一下個地盤既情況啦. 然後我就搭巴士去了esplanade滙合了raymond tsang, simon跟權哥, 因為今天晚上佢地話要去一間日本野度食.

我地最後經過之前辦F1的跑道,再行到去singapore flyer 果度既一家日本野食果度, 果度有得任食架. 呢度都真係幾好食既, 熟既野真係幾好食既, 生野就少d選擇啦. 最好笑既係我地四個男人, 望住果個用日文音譯為英文既menu, 係大家都係度估估下囉. 那幾個waitress都好有耐性咁每一次我地點菜都用廣東話同我地解釋果d係乜野黎既, 咁既服務態度真係好掂喎.

之後我地夜晚行果度一陣, 上個禮拜因為機件故障, 所以呢個singapore flyer停了. 但是燈也開著. 雖然上不了去, 但是在下面影相也是幾靚的. 我們影了很多相, 然後搭70號巴士返屋企.

<<寒冷的香港 (七)>> (2008-12-26 五)

Boxing day, 一早起來食完早餐就要返番去加坡了. 朝早就去了機場搭飛機. 不知為甚麼總是覺得這一次返香港每一天也很累... 可能真是上班族放假時會有的感覺吧. 然後呢, 上到飛機, hae左一陣, 諗住睇下戲啦, 但是現在播的是batman dark knight...可能是收音太差了吧, 所以看看下我也睡著了... 真是搞笑.

一落左飛機, 都差不多是一點了. 開了電話, 先是收到wai kit的電話, 再收到anais的電話... 看來也有很多人找我呢. 我搭了skytrain去了T2搭mrt, 然後就直接去地盤了. 因為反正我拎著的行李不多, 所以就直接過去. 去到地盤都差不多三點. wai kit也在. 我今程簡直又變左做佢既聖誕老人啦, 帶了很多禮物給她. 返到黎地盤, 只是check check email, 再聽聽wai kit這個零禮拜發生過乜野事, 咁跟住又一天了.

晚上還是和raymond tsang, 權哥去了harbour front 的food court食野啦. 食了藥材雞.

咁就返左黎了...

第三季在新加坡的生活開始!!!

<<寒冷的香港 (六)>> (2008-12-25 四)

聖誕節, 早上和屋企人去了影樓影相, 因為要補番細佬既畢業相呀, 所以就去左佐敦既一家影樓影. 影左都好多張, 跟住仲要揀相, 最後只揀了十張. 都好好啦, 影番d全家福. 很好很好.

晏晝我地返左青衣城食KFC, 然後就去了冼的屋企. 今天晚上去了冼的屋企食飯, 也是參觀了他的新居了. 今天立, losa, 何銘山同埋琛妍都有黎, 琛妍都已經小一了, 時間過得真係快. 睇住佢而家講野咁老積真係好搞笑呢.

這天的聖誕天雖然是簡簡單單的, 但也是一個很好的聖誕節了.

明天又要回去新加坡了, 怎麼每次都是開始覺得捨不得的時候就離開了.

<<寒冷的香港 (五)>> (2008-12-24 三)

今天很忙呢, 先是返了去office, 是沙田的office, 因為要返去claim 錢. 返到去基本上也沒有甚麼時間同同事們吹水啦,費事阻住人地做野啦. 我只是借了pat  wong既位整了少少果d claim form, 跟住就算. 我見KL也很忙也沒有去佢房搵佢了. 也落了13樓跟rick講了兩句, 之就出發離開.

下午約了肥仔晏晝在杏花村食晏晝, 我們去了食上海野, 因為好耐無食囉. 其實都無見肥仔好耐啦. 真係好好呢可以一齊食晏. 我們買了奶粉之後就搭了小巴去小西灣的藍灣半島去探esther... 雖然搭小巴的時候還俾個司機話我地搭錯車, 但是我們還是可以在藍灣半島果度落車順利去到的. 我同肥仔先上去, 然後阿伯才去到. 這次應該是我第二次去esther既屋企啦, 因為很多年前佢結婚不久之後我記得是去過一次的. 今次上去除了探esther and gordon之外, 當然是探他們的屋企既新成員, 就係佢地既BB啦. 話說esther十月尾既時候生左B, 叫做汪尚行, 很得意呢, 小朋友真的好細個. 佢真係好好好得意呢. 雖然間屋好嘈, 但係唔知點解個BB都仲可以訓得著囉. 佢聽住鄭秀文都仲可以舉起隻手黎跳舞好搞笑呀.  我地三個男仔還在那裏食了蛋糕, 也食了些沙律. 很好很好.

之後呢, 我地三個在樓下麥記吹水. 在海邊的地方也難得我地三個又有時間係一齊傾偈. 都係講下我係呢便既生活啦, 都是不錯的. 晏少少我就出左去尖咀滙合了冼, 立, losa 同埋losa 的兩個朋友, 去了pizza hut 既 table for six. 之後又再去行街, 行左好耐之後跟住倒數之前就回家了, 因為實在是太累了.

<<寒冷的香港 (四)>> (2008-12-23 二)

這天比前兩天更得閒呢. 這天只是中午去了銅鑼灣找了emily食晏晝. 好耐無見啦emily (其實前幾天才在朗豪坊見過面...) 今次回來最後也找到時間搵你食飯呢. 我諗你做野都應該很忙的了. 我地去了銅鑼灣食西餐. 平時在新加坡這邊很少食西餐呢. 很好很好. 這天好像我還未習慣香港凍凍的天氣呢, 真的很凍.

跟住返了屋企, 打了陣機, 然後就在家食飯了. 晚上還煮了肉骨茶, 很香, 但是因為沒有黑油, 所以弄不出應有的味道.

<<寒冷的香港 (三)>> (2008-12-22 一)

今天就比較得閒一點了. 今天早上很遲才起床. 然後呢, 今天中午出左去, 我今日去搵peggy 同vivian食晏晝飯呀. 在太古城. 其實果陣時我臨黎新加坡之前都想搵佢食飯架啦, 點知, 果陣五月尾六月佢有兩個禮拜返左新加坡, 佢一返黎既時候我又要開始忙去新加坡的 farewell dinner了. 今天終於可以見番食飯真係好好呢. 今天最後結果都是去了太古城的food republic... 難得返到香港還是去了food republic... 哈哈, 不緊要啦, 這也是我自己揀既. 中午十二點半我去到先搵位, peggy放lunch再過來, vivian 再遲了一點才到. 同peggy傾計的感覺很得意呢, 因為佢是由新加坡過來香港的, 而我呢, 我就係由新加坡返黎香港的...每次講到關於新加坡這個地方也覺得很特別. 例如這邊的動物園好唔好玩, 有邊度既香港茶餐廳好食, 邊度有得飲早茶等等等等. 很有趣呢. 佢話佢五月會返黎新加坡放假. 睇下到時我仲係唔係新加坡啦, 如果係度又可以有人陪我一齊去玩了. vivian 就因為剛剛開始cool 牙所以看來不可以食硬的食物, 所以我覺得我揀左去food republic 是無錯的.

還有, 一個很有趣的時間, 就是我幫佢地買野飲既時候. 咁我就去買啦. 好似係新加坡一樣... 我買了兩杯奶茶同埋一杯可樂. 我拿了埋位, 佢地話...糖呢?? 因為新加坡既奶茶是加練奶, 是不用加糖的, 所以我也忘了拿... 咁我唯有返番去拿. 然後回來...我又發覺我無攞捧捧囉...看來我習慣左新加坡既這種生活了. 一時間回到香港有點不習慣呢.

之後peggy要回去工作了, 我同vivian就係太古城行街啦. 呢度都好好呀, 我其實應該好多好多年無黎過呢度了. 跟住我就去了其中一間department store買了一盒lego做聖誕禮物. vivian也買倒野啦. 行到三點幾四點鐘我就要先返屋企, 然後我先返左屋企, 再之後再出去又一城, 再去了深水土步同阿拉一家人去了那一家叫做三姐既打邊爐食飯... 今天林天俊病了只是來了一會呢, 天悠就看來認不得我們了, 思言大一點就當然還認得我們啦. 很好的一餐飯呢, 當作是做冬啦.