<<新教會>> (2008-06-29 日)

今天是禮拜日, 我就梗係要返教會去崇拜啦. 今天早上九點半先起身, 跟住呢, 就按著尋晚阿kit俾我既指示, 先是去lavenda mrt站, 再搭去city hall站, 然後去搵間carlton hotel隔離再過多條街既queen street 既裏面轉角的一家教會, 叫做衞理會感恩堂. 呢間教會都是座堂式架. 其實呢, 原來呢度既衞理會其實即係香港既循道衞理會咁啦. 我十一點倒黎到, 阿kit的一家大細都差不多時間到了. 其實阿kit是以前返呢間教會既, 因為我既緣故所以佢先至專登今日帶我返呢間教會呢. 阿kit的家人有佢老婆啦, 佢個女啦, 同埋佢個外母. 我地到左就入去啦. 呢度既教會都幾大架, 好似有好多層. 大禮堂是在二樓. 我們入左去. 一入到去既感覺好似大學果d lecture theater咁架, 因為佢d坐位是梯階式的. 好快崇拜就開始啦. 呢度既崇拜內容都是差不多啦, 形式都是差不多啦, 詩歌都是差不多啦, 但是d程序既次序就有點不同啦. 還有, 因為這是衞理會, 所以佢地祈禱後係會講"誠心所願" 而唔係講 "阿門" 既. 就係咁啦. 還有, 因為我去的是廣東話崇拜, 而新一代的新加坡人係唔會再用廣東話既, 所以在坐的都是長者. 我諗是大部份人個頭都是有白頭髮架...(我也有很多). 跟住完左崇拜我就同果度既人認識下咁啦. 認識左阿george的一家人和麗英. 他們都是這間教會好耐的會友. 麗英好像也是好耐之前由香港來的. 之後呢, 我地去左一家港式茶餐廳度食晏, 在這裏一邊食野一邊傾偈呀. 講下生活啦, 工作啦, 信仰生活啦等等. 很好呢. 他們都很友善, 很好呢. 傾談之下, 發覺原來我係去左左崇拜呢. 其實我呢個廿零歲既年紀是應該去青崇既英文崇拜架. 時間是禮拜日下晝的一點. 等我下個禮拜去參加下試試先.

之後阿kit帶我行了raffle city一陣, 因為我想申請d plan上網, 但是原來呢度既上網plan係要有employment pass才可以申請的. 咁唔緊要啦, 唯有等到有employment pass再申請啦. 跟住阿kit又帶左我去百勝樓. 呢度其實即是書城, 有好多書局. 都幾大架. 我在這裏整了隻錶帶. 明天可以戴新錶了. 很好很好.

之後阿kit就和我分開了. 我跟住就一個人去流浪啦. 今天終於第一次一個人去流浪了. 首先, 我是在百勝樓行左一陣, 跟住呢, 往bugis方向出發. 首先是去了national library. 原來外國人黎呢度借書要俾錢既... 但係呢度真係好似幾先進. 同香港的圖書館好似無乜得比喎.

再之後呢, 我本來諗住去bugis搵超級市場的. 但是行下行下, 都唔覺有超級市場既. 行呢度既商場其實好似d旺角既商場咁樣都係賣d潮流野, 跟住我見悶悶地, 就去了果個bugis street裏面的一個街外的market行. 首先的店鋪好似女人街咁樣啦. 有d野搭成既. 我行左一陣. 呢度雖然是街檔, 但是一d都唔平呢. 我再行啦, 去到另外一個街外的市場. 我諗大概好似果度既街市咁啦. 我係呢度既開頭見倒有間類似日本城既野, 就去左買d日用品啦. 都幾好.

再之後呢, 行左去一檔野賣泰國人衫架, 我好想買件呢...但還是忍住唔買住.

再之後呢, 一直去, 唔理自己去緊邊度了. 就去到小印度. 呢度真係超級多印度人呢. 呢度又係, 果度又係. 感覺就好似旺角咁但係全部人都變晒印度人囉...我係一檔野度買了三個蘋果. 因為都好似無乜幾河食生果. 然後呢, 亂咁行. 完全唔理方向. 行到攰囉, 就回頭望一望見倒個the concourse的office. 就知道路返屋企啦. 回到屋企樓下, 食個面, 跟住返左屋企.

今日好驚呢, 返到屋企, 唔見左張枱同埋唔見左兩張椅囉...原來是公司果個租樓agent黎拎走左囉... 搞到我d野pat晒係我張床度...又唔問人無啦啦拎走晒d野. 真係有點無奈.

今天晚上我都執拾左一陣啦. 因為要預備明天晚上搬屋.

<<新口味>> (2008-06-27 五)

今天中午都是去了那個sultan kitchen果度食野啦. 呢度食野都ok既, 一來平, 二來乾淨, 三來近, 四來唔使等位. 我地幾個同事黎又方便. 今天我終於試了啦沙. 對住果dull野真係唔敢叫架, 但係我諗都唔會辡得好誇張, 所以就叫左啦. 其實我都唔明白乜野係啦沙, 應該係有d好濃既湯, 加少少魚蛋, 再加d豆腐pop, 再加左d芽菜, 同埋有d類似lai粉既野咁啦. 食落, 又真係幾spicy. 我仲叫了杯奶茶 (記住, 這裏只有茶走, 無港式奶茶的). 嘩, 坐在戶外真係食到滿頭大汗架.

今日公司好忙呀. 唔知點解有咁多野趕. 基本上成個下晝都無停過咁滯. 因為真係有好多野要搞呀. 搞極都搞唔掂呀. 今天真係望住個咸蛋黃黎做野架下晝. 都係果句. 呢度環境真係唔錯.

做到晚上八點幾, 我, 仙姐, raymond, hy 同埋mgs的徐老板行左好遠去到唔知邊度食野. 黎到一間叫做味亭的地方. 呢度食既野其實同和民差唔多啦. 但是好似無和民咁好食啦.

之後一個人回家. 今天權哥返了香港, 所以今天只有我一個人在家咋. 一個人住咁大間屋明真係有點唔慣呢.

明天早上都是要返公司做野, 下晝就去果個獅子魚果度玩啦. 哈哈, 終於可以行下呢個地方.

<<新朋友>> (2008-06-26 四)

今天返工和平日都是一樣啦, 八點半起身. 今天的早餐都是要食前日買落了的面包. 今天塗了點權哥買的gayang. 唔知點解佢個gayang是綠色的. 我整左少少咁啦. 嘩, 真係幾甜既呢樣野. 之後就好似平日咁返工啦. 返工今日其實都無乜咁特別既野, 都係忙忙忙咁啦. 但係呢, 漸漸發覺, 因為返工的時候其實都是開住個msn, 又可以隨時同朋友仔聯絡, 所以其實同係香港做野都係無乜分別既. 只是夜晚返到屋無得上網就真係麻煩少少. 等我今個週末去整埋個上網既野佢先啦.

今日晏晝我, 仙姐, 權哥三個人去了那間風味館果度食. 今天我叫了個咖哩雞飯, 都幾好食呀, 不是太辡. 呢度食野我發覺. 呢度既味道大部份都是很濃的, 食左咁多餐都係, 連本奶茶都比較濃d的. 呢度的奶茶都是茶走, 不會用砂糖的. 還有還有, 這裏很人會飲薏米水. 唔知點解., 度度都有得飲的. 哈哈.

之後下晝呢, 做既野都係幾忙的. 今天的工作就是要搞果d shop drawing 之餘, 還要做一些二三樓修改的平面圖咁啦, 再之後呢, 又要幫下手答rfi咁樣啦. 其實都幾充實呀, 因為都無乜時間可以停落黎既.

今天晚上都是我, hy, raymond tsang, 權哥, 仙姐, 加埋一個mgs的同事一齊去食野. 去左一間叫做魚頭爐的地方. 呢間野好似好出名. 我地黎都是叫餸食飯. 今餐應該是來了之後食得最貴既一餐啦, 我食左11.8坡紙呀, 即是差不多70蚊港紙了. 不過又真係幾好食. 同埋呢, 一天裏面, 除左要食兩餐之外, 我發覺是根本就無洗費的了.

今天晚上回了屋企, 打了電話回家. 細佬話佢地買了一磚涼粉呢... 好似好搞笑. 還有. 今天晚上終於的起心肝打電話給小燕. 話說呢一位小燕是JENNY在New Zealand時的朋友, 是一個馬來西亞的女仔. 我走之前Jenny給了我小燕的msn, 所以就可聯絡了這位新朋友啦. 哈哈, 其實我連佢個樣係點都未知就打了個電話給她了. 原來佢都唔係黎左新加坡好耐, 佢都只是三月的時候才來. 佢而家返工的地方是同我同一幢大廈的. 我在33樓做野, 佢就係另一間公司在4樓做野. 呢個世界真係細呢. 等我遲d仲可以約下佢食晏或者禮拜六日周圍去呢. 真係好. 黎到唔夠一個禮拜就識倒新朋友.

還有, 因為唔記得抄起阿kit的電話, 本來今天晚上想打電話給他的, 但是都打唔倒了. 明天再打吧.

<<新口音>> (2008-06-25 三)

今日終於見識到一d新加坡人的口音.

其實之前兩天都是在office工作, 可能大家都好少會用英文, 主要都是廣東話或者是用華語, 即是普通話傾計, 所以, 都唔係好覺有口音的問題. 今天下午, 仙姐帶左我出去開會, 去了一家則師果度開會. 果間則師個名是叫做dpa, 好似話係全新加坡最大的一家則樓. 佢地既office係marina center. 我同仙姐坐的士去. 去到啦, 呢家則師樓有一個common的地方大家可以一齊開會的, 開放一點. 之後來了一大班人啦. 個個我都唔識既, 我諗, 佢應該大部份都是本地的人啦, 只是個e&m 的一個大佬同埋我同埋仙姐係香港人之外. 嘩, 開會呢, 話說用英文啦. 其實佢地d發音都ok的. 但是呢, 我覺得最唔集慣的就是唔知點解佢地會用埋晒d "no problem la", "difficult la" 真是好似睇緊小孩不笨咁架. 哈哈. 在這裏開會都不錯的, 起碼d人又唔會好似香港d client咁話人, 同埋, 呢度有部免費的飲品機. 其實是一個免費的自動售賣機, 真係唔錯架.

今天晚上和了raymond, hy, 仙姐, 權哥去了小阿拉伯區裏面食野. 都幾好食呀. 黎左呢度幾日, 發覺呢度食既野都幾熱氣的.

<<新電話>> (2008-06-24 二)

今天早上和權哥去了食早餐, 是在隔離office的一個food court. 原來新加坡呢度好奇怪架, 我office附近的building一般都是會有商店, 有food court, 有office, 同埋有住宅的. 是每一幢building 都係咁既. 真係幾搞笑架. 還有, office 對面有一個印度人的社區, 叫做小印度. 果度全部都是很低的平房. 我地就是很高的office.

今天的主要工作是和婉卿幫手對果d shop drawing. 我都唔明白點解有咁多shop drawing的. 原來我的工作是做那個mc02 及 mc03, 簡單點來說就是在新加坡聖陶沙島的環球片場裏面的兩所酒店. 這兩所酒店不是大, 也不是複雜... 只是可能唔同既地方有不同的要求吧. 這裏的admin 野很多, 很浪費時間.

中午也是和同事去了食food court. 在另一個building裏面. 原來這裏是沒有奶茶的, 只有茶走. 都幾?我呀.

下午的工作有點緊張了. 今天我帶了自己的notebook 去了返工做工作上的事, 個mon勁細, 睇左成日, 真係有點辛苦架.

晚上去了食另一間館子的飯, 其實都是叫?食飯咁啦. 食既野都幾熱氣. 我飯後去了seven買了電話咭. 從此我終於有了自己的電話號碼了.

原來用呢度既電話打番香港是很平的.

<<新生活>> (2008-06-23 一)

飛機遲了到達, 其實都是因為是遲了起飛. 飛機差不多十二點十一先至到達新加坡樟宜機場. 一落機, 其實這裏的感覺真的和香港很似的. 這個機場很現代化. 一黎到就見倒有free internet access的counter了. 我第一個時間就去了那裏發了個電郵細佬報平安了. 出了閘, 跟住去了搭的士. 由機場出去市區的路一路都有大樹在兩旁, 好似好靚咁. 在車上打了電話給爸爸媽媽報平安, 都是很好. 差不多下午兩點半去到office. 原來office是一幢很突出的建築物. 因為新加坡無乜高樓大廈, 所以很突出.

一去到office第一件事就是去了三十三樓找仙姐. 仙姐已經係度啦, 然後權哥先帶了我去我住的地方, 我一開始是和權哥一齊住的, 都很好呀, 有個照應. 我第一天上班就由仙姐帶住去認不同的人了. 雖然是帶了我去介紹, 但是絕對唔知點樣認得晒咁多人. 話說公司有兩層, 一層在三樓, 一層在三十三樓. 我現在就暫時坐在仙姐隔離無人坐既位上. 呢度呢, 不是windows 邊的位置, 但是對著外邊, 方向應該是向西. 這裏的view實在是很好, 可以望得見差不多是大半個市中心區, 加上新加坡以平地為主, 望的地方就可以更遠了.  日落的時候也可以望住個太陽落呢... 原來這裏的view是這樣好的.

其實第一天都無乜好做, 又未有電腦, 所以都無乜野可以搞. 其實主要的工作還是等埋其他香港的同事一齊食晚飯. 我地最後差不多九點才離去, 在一家食類似中國野既鋪頭裏面食. 其實d野食又唔係咁特別好食, 但是都要差不多十蚊坡紙... 算啦. 但是最無癮就是要同大老闆一齊食, 完全唔知點好.

回到屋, 鋪很多謝權哥已經給我預備好了床鋪. 很好很好. 我可以一個人訓一張很大的床, 是一張queen size的床呢. 我呢世仔都未試過可以自己一個人訓一張咁大既床.

好, 累了, 睡了.

第一晚, 不知怎的, 已有點想回家.

<<道別你了 -  我最捨不得的爸爸媽媽和細佬>> (2008-06-23 一)

今天早上要搭飛機離開香港了.

昨晚也睡得幾好. 今天早上六點鐘就起身了. 爸爸媽媽都已起身了. 今天爸爸不送機了, 因為佢要返工. 在家裏, 我也是忍住喊的和爸爸說再見, 細佬和媽媽黎送我機. 我地七點鐘出發左右, 我地搭的士去機場. 三個字倒就到了. 到了機場, 我們先是check in啦, 原來電子機票都係咁方便既, 真係可以乜野都唔使帶的. 我只是給了櫃位我自己的特區護照就可以了, 真的很方便. 我的行李經過我自己的精密點算, 是有20.8kg, 好, 因為limit是20kg. 我所以另外都帶了個手提袋同埋一個背包. check in 後我就去了登記了asia miles. 再之後就和媽媽同細佬行左過去terminal 2 跟住返番去terminal 1因為果便d鋪頭都未開. 之後我地三個在大家樂食了點東西. 我就無食啦, 因為今早已經飲了奶茶同埋食了少少餅干. 食的時候我還可以不停地用sms跟不同的人道別...

最後呢, 食完之後八點半倒我都差不多要入閘了. 在入閘的門口叫了一個保安人員跟我們三個人拍張照. 我都知道拍照的這個時候是一點都不容易過的, 就好似閃光燈一閃眼淚就要流出來一樣. 當然是和媽媽喊了一會...實在是忍不住眼淚的. 和媽媽抱一抱, 道別了媽媽.

之後入閘, 也許我也不想媽媽再喊, 所以入閘後都沒有再打電話出去的了. 在排隊的時候, 真的好似拍戲一樣, 一段段的片段彈晒出黎呢.

無啦啦咁走左去, 其實是不是自己太自私呢

也許, 這也是時候我要堅強上路了.

過了關, 跟住按著指示去了 gate 64. 行左好耐去到gate 64時才知道原來臨時改了去gate 50 呢. 結果又是要行一大輪行到去另一個wing的盡頭, 真係行到我索晒氣. 但這段咁趕的時間, 也令我暫時唔諗咁多野...

上了飛機. 坐定了, 給細佬發了個短信. 跟他說了句再見. 臨關電話前收到他的回覆... 他說他們替我照顧屋企呢. 也許, 我這麼一走, 原來我只想過令自己可以獨立一點, 改變自己一點... 但原來, 也是逼著的, 家人的生活也改變了.  一下子覺得細佬大個左好多.

飛機起飛了, 飛了上天空.

<<道別你了 - 這一班可愛的團友>> (2008-06-22 日)

今天是禮拜日, 也是最後的一天留在香港了. 做了好幾件事.

朝早都是照常的去了梨木樹果度帶兒童崇拜. 哈哈, 開始有點捨不得這裏的小朋友呢. 其實, 天朗, 家賢, 漢生, 曦彤同埋張豪燊佢地其實都好聽話好乖的. 這是一班很可愛的小朋友. 還有這裏的大人啦, 豆豆啦, 諾諾啦...等等等等. 原來我也是捨不得的. 今天這一課是講關於尼希米起城牆. 這個故事都是和我們說, 其實做甚麼困難的事也好, 最重要的還是神...一個真實的神.

好快就左兒童崇拜的時間了. 今天我也很早就走了, 因為, 今天有一件很重要的事要做, 就是要返屋企陪媽媽了.

之前其實方堅都提左我好多次, 叫我多d陪媽媽, 佢會有好多野想同我講的. 哈哈, 其實一路都唔敢好明目張膽咁問阿媽"你有無野想同我講呀?" 其實都是怕搞到個場面太悲, 我自己會喊時又會搞到阿媽都會喊. 今天下午和媽媽去了樓下青衣城的一粥面果度食晏. 在這裏和媽媽兩個人食飯, 果然媽媽仍然有好多野係好擔心我架. 其實都好正常既...其實有好多位我都想喊架, 但是實在是要忍, 因為如果我都喊媽媽就會喊得更加西利架啦. 之後我地去了實惠買埋果d拖板, 之後就返左屋企, 休息了一會, 也和變態人傾msn了一會. 很好呢. 其實都好少可以同倒變態人傾倒msn用voice call架啦. 實在是不錯.

之後呢, 都先是搞番好部電腦先啦. 因為新的電腦其實有很多東西都要重新調較同埋適應過的.  搞好部電腦之後都有和媽媽傾計的時候. 這個時候我真的問了她 "我明天就走啦, 你有無野要同我講呀." 之後媽媽都有好多野想同我講呢... 之後我再一次點齊所有的行李, 跟住五點倒就出門口去了教會.

今天的晚上馬太團的團友farewell, 我大概五點半就返到教會了. 這一天的教會也不只是有團友們呢. 大姐和阿拉也在. 他們因為要等閒視之去食盧姑娘果餐既聚餐. 在這裏見倒阿拉, 阿拉都好唔捨得我. 一黎都抱住我喊了出來了. 之後再遂一和教會的其他朋友道別. 其實我都唔係去好耐?, 都只是三個月就會返一返黎香港架啦. 大家唔使咁唔捨得我呀.

這一班馬太團的團友真的很可愛. 其實這天晚上不只是farewell我的, 還有的就是和六月生日的團友仔搞生日會的. 我們在教會叫了到會. 到了差不多七點零就等齊人啦. 唔知點解今天大家都好自然地坐左個u字型, 也許大家都集慣了返團契了. 還無啦啦叫我出左去講左一兩句開場白啦, 講下自己走啦, 還無啦啦叫我一個人唱了生日歌啦...(無奈) 祈禱之後大家就開餐啦. 呢間野真係唔錯架, 我幾喜歡呢間到會野. 食野的時候當然是要和不同的團友傾計啦. 今日好開心呀, 琪琪姐姐也有來呀. 雖然我都識左佢一段時間, 但是其實都未叫過佢返馬太團呢. 今天晚上除左食野之外, 團友們也送了我很多的禮物. 真的很多謝你們呀!!! 我會將呢d禮物帶過去新加坡用架啦.

最後呢, 要特別鳴謝losa, 因為除左今天的野食外, 今天晚上佢仲特別地諗了些遊戲等我地玩. 我地一班人雖然年紀不少, 但是都玩得很顛, 哈哈哈.

回家的路途上, 細佬跟我說:"你終於都要走啦."

回到家, 把禮物拆, 越拆, 心裏越捨不得...

<<道別你了 - 馬可團和只見了三次的朋友>> (2008-06-21 六)

今天早上和細佬終於的起心肝出左去深水土步果度睇電腦. 最後都是決定了買Eee PC 901, 因為實在是比起工人舍果d順眼. 但係早上都無買到, 因為暫時未有白色貨.

中午是馬可團導師Farewell及食晏. 我地先去了茶樓食晏, 再返了教會傾了一陣關於未來的事工的方向. 其實馬可團也實在是有他難處, 暫時也未搞得掂怎樣同基督少年軍並存.

馬可團, 今天是天才表演. 團友們雖然好像沒有甚麼準備, 但是都好西利地即場表演. 天樂扮果d廣告真係好好好好搞笑呢. 尤其是那個O泡果奶...真係O咀囉. 天朗表演魔術都好西利呢. 還有君晧的lou計式, 芯芯的彈琴. 還有錦言和錦華既圖畫. 佢地仲畫左一張我個樣既俾我呢. 哈哈,原來我都幾靚仔喎.

馬太團今天是靈修. 雖然時間不太多, 只有半個鐘的時間, 但是咁靜靈修都真係唔錯架. 靈修後還可以分組分享呢...如果以後在新加坡都有咁多時間靈修就好啦.

之後就一個人去了高登買了那部Eee PC 901 買了4480 貴了兩舊水. 算啦, 因為實在是沒有時間再到處找了. 但最搞笑的是我在提款機的時候無留意佢無晒五百蚊紙, 所以就一禁就出左4000蚊的一百蚊紙呢. 我見倒真係唯有O咀...

晚上回了家和媽媽食飯. 之前方堅都不斷提我話我媽媽會有好多野想同我講架啦. 果然是呢... 今天晚上媽媽講左好多野, 又擔心呢樣又擔心果樣. 媽媽, 唔使咁擔心既, 我都大個仔識照顧自己架啦.

再之後呢, 我去了青衣城去同昕明聚一聚. 今次只不過是第三次見佢啫, 估唔倒咁快就要同佢講再見呢. 呢間仙跡岩好似好耐無黎過了. 在這裏聚了個零鐘, 雖然時間不長, 但是可以在走之前同你聚一聚真係好好.

<<道別你了 - 少年不識愁之味>> (2008-06-20 五)

今天是在office 的最後一天了. 同事們很好呢, 送了我一個 OT Gift Pack, 裏面有好多OT必備既野, 有糖啦, USB風扇啦, 還有一張咭呢. 真係好好.

還有, 今天中午KL又再和我食飯同我Farewell. 我, KL同Kelvin去了食Simply Thai. 呢度都幾好食呀, 我尤其是喜歡那個湯. 幾好食的. 其實真好多謝KL呢四年以來我真係係佢身上學倒唔少野呢. 尤其是近年搞左愉景灣的project 我直接Under佢的. 真係好多謝佢教我咁多野, 同埋又俾機會我過去新加坡做野.

今天晚上返了少年軍. 各位都很忙著為我farewell呢, 真係搞到我都有d唔好意思. 今天晚上MADAM LO真的為我整了碗仔CHI呀...真係好好呀... 今天隊員們返到來, 其實佢地都唔知道乜事, 直至到有野食的時候我才宣佈一個好消息同埋一個壞消息.
1) 好消息就是今天不用步操
2) 壞消息就是今天我最後一次集隊了.

哈哈, 隊員們果然是年紀太小, 未知道甚麼是"說再見", 未知道那裏是新加坡, 還以為是在新界附近呢.

真的少年不識愁滋味.

育鉛還笑住咁問我 : "你會唔會唔記得我地架?"

"哈哈, 梗係唔會吧." (呢 d係喊位黎架, 真係忍得好辛苦)

最後MADAM CHOI還整了芝士蛋糕同埋我地導師也拍了照. 佷好.

之後馬太團一班團友還去了西貢星食野添~~!! 看來這天也是要向西貢星道別了.

 

<<道別你了 - 大姐大姐夫>> (2008-06-19 四)

今天禮拜四, 都無乜野好搞架啦. 只是很突然地KL把神秘任務的糧今天俾左我呢. 搞到我本來唔打算買電腦過去的, 而家最後都是決定買過部notebook過去. 我諗都是去買華碩果d細細部notebook仔啦.

今天晚上和大姐大姐夫食飯呀在沙田. 因為大姐隻腳腫左, 所以今天先食飯. 佢腫得好西利呢. 我問佢痛唔痛, 佢話唔痛既, 只是有點酸, 但是就真的很腫呢... 我地在沙田食了飯, 傾左一些之後在新加坡的事. 因為我都未去過新加坡呢. 但係大姐去過啦...很好很好. 佢地話可以遲d黎探我呢, 很好很好.

<<這些是我要帶的東西 (二)>> (2008-06-18 三)

今天終於來到禮拜三. 朝早帶了Derek 同Kelvin去了project meeting. 過埋今天都總算是交低晒所有的工作了. 今天開會都唔錯呀, 有Derek 帶住, 我諗Kelvin都唔使驚既.

下午返左去office, 今天下晝都無乜特別野搞啦, 最緊要就是要清乾淨自己個位咁啦.

晚上回了家, 看來有很多野要執, 這是revised 了的list. (revise左少少)
- 恤衫多件, 返工用
- 長褲幾條, 返工用
- 短褲, 放工用
- Socks, several
- 毛巾一大一小
- 泳褲
- 泳鏡
- 短袖t shirt 幾件
- 拖鞋
- 皮鞋
- 波鞋 (著住去)
- 新的手提電腦
- mouse
- web cam (已跟新的手提電腦)
- lan 線
- 火牛
- 手提電話
- 數碼相機
- Alanis 送的掛飾記念品
- 廣西小朋友們的信
- 聖經, 一大一小
- 常用藥物
- 記事簿
- 少量文具
- 後備眼鏡
- 港幣
- 少量坡紙
- 牙刷, 牙膏和小量去camp用的個人清潔用品
- 特區戶照
- 背包
- 工事包, 返工用
- 火柴人水樽
- 幫仙姐帶的毛巾同埋dvd
- 縮骨遮
- 錶
- 鬚刨

<<道別你了 - 特興會>> (2008-06-17 二)

今天中午我約好晒我果組的同事, 一齊去了總廚果度食晏當做是farewell. 都很好呀, 大概有十五六個同事一齊食飯, 一枱雖然逼逼地, 因為個個都咁大隻, 但是都好好呀. 其實呢度都幾抵食呢, 我地十五個人都只不過食了五舊水多d. d野食又幾好食, 真係幾抵.

之後晚上約了特興會. 今天晚上在pancake color果度食. 其實之前我地都幾鐘意黎呢度架, 印象中第一次分家黎過呢度, 跟住我同大胃又黎過一次, 之後特興會又黎過幾次咁. 都幾好呀. 我地一班中學同學咁耐都是有聯絡真係好好架啦(雖然我成日唔同佢地踢波). 我地食完之後十點倒, 跟住就去左許留山等埋肥仔同埋luye出黎吹水傾偈傾得一陣十一點半倒都終要離去.

<<道別你了 -  多年的朋友>> (2008-06-16 一)

今日下晝俾人捉左去開會, 俾人捉住左, 傾左好耐. 差不多七點鐘先走得甩.

今天晚上在APM同家姐, 細佬, Edith, 峰, Esther同佢老公食飯...其實個個都好耐無見啦, 今次Esther仲粗身大細添呢... 我地去了紅螞蟻. 好多年前我地好鐘意去呢度食野架. 很開心可以見倒你地呀. Esther雖然年紀都有番咁上下但是依然係咁多野講...哈哈. 佢老公都幾搞笑呢. 走的時候還收了家姐同細佬的禮物. 多謝.

加油呀細佬, 你會好快搵倒工架啦.

<<道別你了 - 六樓的家人>> (2008-06-15 日)

今朝都是如常地返了梨木樹的教會. 今早的兒童崇拜就少左少少人啦, 今天只得三個同學. 但係咁都好呀, 人少少, 講都無講得咁氣咳. 今天講的是尼希米返番去耶路撒冷起城牆.

之後呢, 很趕忙地返左石硤尾教會. 因為今天是幼級組的導師開會. 我一返到去就不停地有人問我呢樣問我果樣野啦. 搞左一輪先至出倒去食晏. 都是去果間好近既米線鋪. 在這裏一邊食米線一邊睇 "一本漫畫闖天漄". 其實呢度的米線也不是特別好食, 只是就腳罷了.

返番去教會, 兩點半開會. 今天有我, 恩賜姐, madam lee 同madam leung 開會. 講的主要內容如下. 1) Farewell 及我走左之後既安排 2) 暑期招募與導師人手. 3) 暑期的DAY CAMP. 都好好呀...我地傾左唔係好耐, 但是很有成果...

之後很趕地出了旺角會合了細佬和媽媽, 因為佢地話要買個背包給我. 行左陣, 最後在朗豪坊買了個黑色的, 很好. 然後還去了奧海城, 再行.

我諗以後同屋企人行街街既機會會少好多了.

晚上去了名豪, 又返番去石硤尾. 今天晚上的訂了枱和阿拉一家人食飯. 本來諗住今天是父親節, 諗住茶樓一定好多人啦. 點知. 原來係無乜人既.

飯後三姐還送了我們一家返屋企, 她送了個gip給我, 真係很多謝你呀~~!!

<<道別你了 - 馬可團的團友>> (2008-06-14 六)

今天本來是約了謝可儀去朝早靈修的, 但是因為天雨關係取消了, 所以唯有食完早餐就和她去了冰室食飯啦. 今天來我想都是要道別這一家冰室啦. 很好, 謝可儀提了我很多在那邊生活要注意的地方呢. 很好.

跟住就要準備馬可團. 今天馬可團煮野食. 我同左謝可儀去買餸, 買左瘦肉, 火腿丸, 蕃茄, 蘿蔔, 菜芯. 雞蛋. salt, 啫喱粉, 生菜. 返到去啦, 原來芯芯已經預備左好多材料呢. 佢煮炒公仔面, 好似好pro咁呀. 其他兩隊都ok架. 我地最後都可以食大餐. 真係幾西利. 佢地煮起上黎都ok喎.

之後回家了, hae了一晚.

<<道別你了 - 不敢和你說再見>> (2008-06-13 五)

今天下午入去了愉景灣開site meeting, 今天都應該是最後一次去開site meeting啦, 好, 終於要離開這個地盤了. 因為今天落雨, 我行去地盤的時候都整污糟晒對鞋了. 很不方便. 開會也沒有甚麼很特別的東西, 只是坐同埋聽.

之後呢, 晚上返左去少年軍集隊. 今天我也不用負責甚麼, 只是回來協助.

本來諗住今天和各位幼級組的小朋友講再見的, 但是怎樣都講唔出口呢.

今天收到了美言的禮物, 多謝多謝, 很多謝你贈我的金句呢.

之後和黑仔去撐枱腳, 都是去品香樓食肉絲炒面. 很好.

食面的時候發覺原來我還未和Emily講話我23號走呢. 睇黎我地都暫時無緣再見了.

回家的路途上在荔景站也見到了莊老師. 莊老師仲本來話八月會去梨木樹睇下見唔見倒我呢...但是我好快就走啦, 見我唔倒啦.

唔好咁啦, 每日都要講再見, 每講一次再見就代表更加唔捨得呢度既人和事.

<<這些是我要帶的東西 (一)>> (2008-06-12 四)

其實呢個禮拜都不斷的想, 要帶d乜野呢. 以下是一個簡單的checklist. (原來真係好多野要帶)
大家得閒的話幫我望望, 睇下有d乜野係漏左既又或者無謂得滯唔使帶既野.
- 恤衫多件, 返工用
- 長褲幾條, 返工用
- 短褲, 放工用
- Socks, several
- 毛巾一大一小
- 泳褲
- 泳鏡
- 短袖t shirt 幾件
- 拖鞋
- 皮鞋
- 波鞋 (著住去)
- 老爺手提電腦
- mouse
- web cam
- lan 線
- 火牛
- 手提電話
- 數碼相機
- Alanis 送的掛飾記念品
- 廣西小朋友們的信
- 聖經, 一大一小
- 常用藥物
- 記事簿
- 少量文具
- 後備眼鏡
- 港幣
- 少量坡紙
- 牙刷, 牙膏和小量去camp用的個人清潔用品
- 特區戶照
- 背包
- 工事包, 返工用
- 火柴人水樽
- 幫仙姐帶的毛巾同埋dvd
- 縮骨遮
- 錶
- 鬚刨

<<道別你了 - 來了半年的診所>> (2008-06-12 四)

今天都是無乜心機做野啦, 晏晝同左grace, jenny, cole去食飯. 大家都好唔捨得我呢, 因為剛剛wicky才落了site, 但是下個禮拜又輪到我走啦.

今天下午搞到差不多四點, 跟住去了診所. 今天睇番果個驗血報告, 今次終於是話我係正常啦. 咁應該好快會好番. 醫生開了三個月藥給我, 還減了我的藥, 咁應該我三個月可以回來睇一次醫生咁啦. 今天睇埋今次醫生, 就可以唔使返黎呢度覆診一段時間了. 很好, 暫別了來了這裏半年的診所.